O le a iai siaki faaopoopo e taofiofi ai le alu o peimeni i tagata Kiwi e lē o toe nonofo iinei, ae e le’i toe sau le cost o living payment i le Aso Tofi nei.
O le uluai peimeni na sau i le amataga o Aokuso o lea e lē o mafai ona faamautinoa mai e le malo pe fia atoa le tupe na alu i tagata le agavaa ona ua nonofo i atunuu i fafo, faapea ai ma nisi ua maliliu.
I lipoti e faapea e tusa ma le 21,000 tagata sa lē tatau ona o latou mauaina, ma e tusa lea ma le $7.35 miliona lea na gau ai.
A o faasauni atu ai la i le peimeni lona lua i le Aso Tofi, o lea o le a siaki tax return a tagata ta’ito’atasi o le 2021 i le 2022; o i latou foi o loo totogi Student loans o lea o le a siaki poo se tagata ua nofo i atunuu i fafo atoa ai ma siaki o tuatusi IP o loo tatala mai ai accounts IR a i latou ua faamautu i fafo.
Ese mai i lea o le a siaki foi totogi i totonu o le 2 masina ua alu ma o loo maua mai galuega i totonu o Niu Sila atoa ai ma le siaki o tuatusi o loo faaaogā i account myIR i totonu o Niu Sila.
Leai se suiga o agavaa mo $350 o loo totogi auauai mai i totonu o le tolu masina, ma e lē o aafia ai i latou o loo okomeki ona maua tupe a tamaiti poo le Working for families.
Ae mo i latou e talitonu e agavaa i le peimeni lona lua ma le lona tolu e lē o maua, e tatau ona faafesoota’i le Inland Revenue.
O siaki faaopoopo ua faia nei, e faapea e tusa ma le 31,000 tagata na maua muamua lea fesoasoani o le a lē maua le peimeni lona lua se’i vaganā ua aumai faamaoniga o loo nofo i totonu o Niu Sila.
