Ua folafola e le malo o Sepania le latou fuafuaga ina ia faatulafonoina le tulaga o tagata e fai atu i lo latou atunuu poo migrants ma ua feta’ua’ina o lea gaioiga o le a penefiti ai le lata i le ‘afa miliona tagata.
Fai mai le BBC o i latou uma na malaga atu i Sepania mai isi atunuu ae leai ni soligatulafono ma e mafai ona latou faamaonia sa aumau i Sepania e lē itiiti ifo i le 5 masina a o le’i oo i le aso 5 o Tesema 2025, o le a mafai ona maua le fesoasoani i lalo o suiga ua folafolaina.
Saunoa le minisita e feagai ma le auaunaga lea, o se aso tāua lenei i le talafaasolopito o Sepania ma ua fuafua o i latou e agavaa i lea faiga o le a tuuina iai se pemita e tasi le tausaga e aumau ai i le atunuu ma e mafai ona toe faaopoopo lea pemita.
Ua iai foi la ma ni talosaga mo le faatino lelei o le tulafono i lea faiga ma ia amata ia Aperila ma tatala atu ai le avanoa e lesitala ai se’ia faamae’a i le faai’uga o Iuni.
O Sepania le isi atunuu ua vaaia le to’atele o tagata na aga’i atu iai i nai tausaga ua tuana’i, o le to’atele mai Amerika Latina, o i latou e leai ni pepa faamaonia.
Puna o Faamatalaga: https://edition.cnn.com/2026/01/27/europe/spain-legal-status-undocumented-migrants-latam-intl
