Ua vāvāō luga o auala o fesoota’iga ma upega tafa’ilagi ina ua oo mai faamatalaga i le see ese ai o le alii o Scott Robertson mai le tulaga o le faia’oga ulu a le ‘au tele a le atunuu le All Blacks.
O se faai’uga na afua mai i se iloiloga ma faatalanoaga a le NZ Rugby.
Ma e faapea Scott Robertson poo Razor e iloa uma ai e le to’atele, o se faai’uga aupito i lelei lea ma o se fuafuaga na faia foi mo le alualu i luma o le ‘au.
I se faasalalauga mai le itulau a le All Blacks i luga o upega tafa’ilagi – le facebook, na faaalia ai manatu o Razor, ma na ia ta’ua lona agaga faagaeetia i lona maua ai o lea tofiga e pei ona ia tauaveina mo sina taimi.
O lona faafetai o le tulaga maoa’e o loo iai le ‘au tele a le atunuu, aemaise tulaga ua iai tama taaalo i le taimi nei ma le maoa’e ua iai taumafaiga i galuega atina’e ua faataoto mo le lumana’i.
I le mae’a ai o iloiloga o lea ua taunuu i se faai’uga le laulauafono e faamuta loa lana konekarate, ma e māua o lea na iai se tasi i lenei faai’uga i le va o itu uma.
O le aga’i ese ai o Scott Robertson poo Razor, o lea ua avanoa ai loa lea tofiga tāua mo se tasi e mafai ona tauaveina le faia’oga ulu ma amata tapenaga mo le alo atu ai o le All Blacks mo le Ipu o le Lalolagi – World Cup 2027.
Ta’ua e Razor lona faanoanoa tele i le mea ua tupu, ae na ia faamanino tulaga o lona taumafai malosi e faamuamua pea le ‘au aemaise o taumafaiga ina ia faatumauina pea le lelei o le All Blacks.
Puna o Faamatalaga: https://www.facebook.com/share/p/1C4PsMZmLs/
