Ua lipotia i le 9News se saunoaga a le ta’ita’i o le Ekalesia Katoliko i le lalolagi, Pope Leo XIV e faatatau i saunoaga a Trump sa faia o le a faatama’ia tagata soifua i Iran.
Fai mai Pope Leo e lē taliaina ia ituaiga saunoaga aemaise o soo se osofa’iga e faia i si’omaga o tagata lautele e solia ai tulafono faavaomalo.
Ua una’ia ai e le Pope tagata Amerika ma isi ina ia fesoota’i i o latou ta’ita’i faakonekeresi ina ia tetee i taua ae galulue mo se filemu.
Valaaulia ai e Pope Leo tagata ina ia manatua o le filemu o loo mana’omia aemaise o le tula’i mai o le taua i Sasa’e Tutotonu ua tele ai le mau lu’itau i le soifuaga o tagata lautele ma atili faaosofia ai le ita i le lalolagi atoa.
O lana fautuaga i ta’ita’i o le lalolagi, toe foi i le laulau mo faatalanoaga e sa’ili ai se tali ma se filemu ma ia manatu i nai alo ma fanau aemaise nai tagata o loo gasegase ma soifua o loo aafia uma i le vevesi o loo iai nei.
Ua faailoa i le lipoti o le isi popolega o le Vatikano e mo tagata Kerisiano i le itu i Saute o Lepanona lea na aga’i atu iai ni fesoasoani a le Vatikano i le vaitau o le Eseta ae faasā ane.
Puna o Faamatalaga: https://www.9news.com.au/world/pope-leo-sa
ys-donald-trump-iran-war-remarks-unacceptable/42a49f61-3a3d-4fe6-aa74-c2be5b655a48
