Fai mai le Premier o Kuiniselani o Anastacia Palaszchuk o le taofia atoa o soligatulafono a talavou mai le setete e le mafai ona tupu peitai o loo galulue lana faigamalo i le faaitiitia o aafiaga o ia soligatulafono.
Ua faia lea faamatalaga a le Premier a o agiga ai le finau a se tasi o talavou lea na pueina i le faalavelave tau taavale na maliliu ai tamaitai e toatolu, o loo finau e tatala o ia i tua.
E na o le 13 tausaga o lea talavou e pei ona auina atu ai lipoti a talafou i le amataga o le vaiaso, sa teena le tatalaina i tua ma ua taofia seia toe tulai i le faamasinoga ia Iuni.
E manatu nisi tagata o nisi o tulafono e malosi atu e faatatau i soligatulafono a talavou ua tuai tele lea mo nai tamaitai e toatolu ua maliliu i le faalavelave e aofia ai lea talavou, ma fai mai nisi o aiga o nai ia tamaitai ua atili faateteleina le mataupu lea auā e le o popole lava ia tamaiti i aafiaga auā o le toatele e le o mafai ona tuuina iai ni faasalaga mamafa ona o o latou tausaga.
