E ui ina eseese manatu ma lagona o le to’atele i le tulaga ua iai nei le pulegamalo a le vaega faaupufai o loo tu i le foe e mafua i le 15 o faipule o loo tauaveina tofiga minisita o le pulega faatonu e aofia ai le Palemia, ma le 20 o faipule o le Faatuatua i le Atua Samoa ua Tasi ua latou lagolagoina le faamuta o le toe avea ma sui o le latou vaega faaupufai o le Palemia ma minisita e to’alima, peitai o loo mau pea le finagalo o le ta’ita’i o le malo o le faigamalo a le Faatuatua i le Atua Samoa ua Tasi o loo tu pea i le foe.
Na faailoa lea finagalo o le tamaitai Palemia i le feiloa’iga ma tusitala i le Aso Tofi ina ua oo i le taimi o fesili a tusitala.
Le afioga i le tamaitai Palemia afioga Fiame Naomi Mataafa i le feiloa’iga ma tusitala.
O le faato’ā toe maua lea o se avanoa o le tamaitai Palemia i le autusitala ma le aufaasalalau e faailoa ai nisi o mataupu e talanoaina ma pasia e le Kapeneta.
O se feiloa’iga foi e maua ai ma le avanoa o tusitala i ni fesili i isi mataupu e fia maua ai se finagalo o le ta’ita’i o le malo.
