I le feiloaiga a le alii Palemia Chris Hipkins ma le autusitala i le aso i Aukilani sa fesiligia ai i le tele o mataupu e aofia ai le totogi maualalo o galuega, mataupu faatatau i le tulafono o faamaumauga aloaia, official information act aemaise le tulaga o faamanuiaga maua e tagata mai le welfare.
Taua e le Palemia o le tulaga lava ia i le totogi aupito maualalo o tagata faigaluega, o se mataupu e iloiloina i tausaga taitasi ma e silasila foi i vaega eseese e aofia ai ma talu ona tulai mai le latou faigamalo o loo faaauau pea ona siitia le totogi maualalo o galuega i tausaga taitasi ma o se tulaga ua tatau ai mo nai tagata o loo galulue malosi i galuega ia maua tupe e tausia ai aiga.
Faailoa foi e le Palemia i le vaega o peimeni totogi mo le vaaia o tamaiti, childcare subsidy ua faaopoopo foi le fesoasoani iai ma o loo silasila pea i auala e atili faaleleia ai i le agai atu i le lumanai.
O le aso a taeao lea e aloaia ai le siitia o le penefiti mo i latou o loo maua ia fesoasoani ma siitia ai foi ma le totogi maualalo o galuega lea o le a iai nei i le $22.70 i le itula pei ona faailoa e le Palemia i se taimi e lei mamao atu.
