Ua faamae’a galuega o lenei tausaga i le tele o auaunaga a le Malo i matagaluega ma faalapotopotoga, ma o le taimi foi lenei e toe tepa ma silasila ai i tua i le amataga o le savaliga o lenei tausaga i mea na tutupu ma faatino auā le tautuaina o le atunuu, aemaise foi o ni masei ma ni faaletonu na aliali mai ai.
I le sauniga lotu faafetai ua faai’uina ai galuega a le matagaluega o le soifua mālōlōina o lenei tausaga, sa saunoa ai le Minisita ma momoli le faafetai i itutino eseese o le auaunaga a le soifua mālōlōina ona o galuega lelei, ae sa ia ave ai foi le faamanatu ma le tuualalo i le pulega ma le aufaigaluega.
O le va nonofo ai o le matagaluega ma le pitolaau a le aufaasalalau, tasi lea o vaega sa afea e le Minisita, e mafua ona o se faasalalauga mai le matagaluega na faailoa ai suiga o itula e tatala ai le vaega mo gasegase tausavali e pei ona amata i le vaiaso nei e tau atu i le aso 5 o Ianuari o le tausaga fou.
O le mafuaaga ona ua to’agaogao le aufaigaluega i foma’i e pei ona faailoa i le faasalalauga.
Le Minisita o le Soifua Mālōlōina le Afioga Valasi Luapitofanua Toogamaga Tafito Selesele, i se vaega o lana saunoaga faafetai i le sauniga lotu faai’u a le matagaluega e taualuga ai le auaunaga ma le tautua o lenei tausaga o le a mae’a.
