Atonu o le tulaga o loo anoano e tagata i le taimi nei ma tulimataia o le sailiga lea o le siamupini o le taaloga lakapi liki a le NRL i le po o le Aso Sa o muamua nei.
Ua vaaia le au tapuai a le Penrith Panthers ma le au tapuai foi a le Paramatta Eels o tau fai faamaopoopo i o latou lotoifale auā tapuaiga o le taaloga.
Ua oo lava i faleoloa i ia pitonuu ua matele ina faaaoga lanu a nei kalapu e vali ai oloa e pei ona faia e se tasi o fale meat i Paramatta ua oo i taumafa o sosisi ua faalanu i le moana ma le samasama o lanu a le Paramatta Eels.
E le o tuumamaina foi e le Panthers ia gaioiga, ua vaaia le taulia tele o aitema mai faleoloa e pei o fu’a, jerseys, pulou ma sikafu i lanu a le Panthers ua sauni ai tagata aua le tapuaiga o le taaloga. Ua oo foi i fale o aiga ua faapipii ai ata o tama taaalo.
E fai si toatele o tamafanau a Samoa o loo tausinio i le Panthers ma o le toatele foi o i latou ia ua mae’a siilima e taaalo mo Samoa i le Ipu o le lalolagi i le tausaga nei.
O loo iai foi alo o Samoa i le au a le Eels ma ua siilima foi isi e taaalo mo si o tatou atunuu. O le po la o le Aso Sa nei o le a fetaui ai ‘au uma nei e lua mai le itu i Sisifo o Sini e saili le siamupini o le liki mo le tausaga nei 2022. O le taaloga e faia i le Accor Stadium ua leai ni pepa matamata o totoe.
