O se tapenaga ma sauniuniga o loo faia ma le agaga fiafia mo lenei alo ta’uta’ua o Samoa, le alii o Stephen Luatua, ona o lea ua maua lona uluai avanoa e taalo ai mo le ‘au a lona atunuu, le Manu Samoa, e pei ona sauni atu i ai mo le aoauli nei i le malae i le Apia Park.
O Luatua na soifua ane i Niu Sila, ae o ona tuaa o Samoa uma, ma o Niu Sila foi na amata fofoa mai ai lona soifua lakapi e pei ona iai i le ‘au a Niu Sila o le Under-20 lea manumalo i le IRB Junior World Championship i le 2010 ma le 2011.
Na iloga le tulai mai o Luatua i le faatinoga o lana lakapi i le tausaga 2013 i le vaitau o le taamilosaga o le Super Rugby, ma ina ua mavae le taamilosaga lena o le 2013 Super Rugby, na aofia ai loa le suafa o lenei alo o Samoa i tofiga a le All Blacks mo le amataina o ana toleniga, seia oo i le taaloga a le All Blacks ma Falani lea na faia i le aso 22 o Iuni 2013 i New Plymouth, na uluai taalo ai loa Luatua i lea taaloga na manumalo ai le All Blacks i ‘ai e 24 i le 9 a Falani.
Na faaauau atu i Europa le lakapi a le loose forward a le All Blacks, ma e ui ina misia e le All Blacks le tomai iloga o lenei alii lakapi, ae na faatino lava le filifiliga a Luatua ma auai atu i le kalapu a le Bristol Bears i Egelani i le tausaga e 2017, i le mavae o ana taaloga faitaulia (tests) e 15 na taalo ai mo le All Blacks ma lana ‘au kalapu le Blues a Aukilani.
O le asō la i le malae lakapi i le Apia Park, o le a maimoa ai loa mo le uluai taimi Samoa i totonu o le atunuu aemaise foi le maimoa atu a soo se Samoa i atunuu mamao e tauala i luga o fesootaiga televavave, ae o le a tamo’e ma faatino mo le uluai taimi, le tomai o le alii loose forward muamua a le All Blacks, Stephen Luatua, i le taaloga faitaulia a lana ‘au le Manu Samoa o le a faafeto’aia le ‘au malosi mai Fiti, le Fiji Water Flying Fijians mo le Pacific Nations Cup.
Sa maua le avanoa e talanoa atu i le tina o Steven i sona lagona i le taimi o le a maimoa atu ai i si ona alo a o tamo’e ma taalo mai mo le Manu Samoa le ‘au a lona atunuu, ae na pau lagona o le tina, o lona fiafia i le filifiliga ua fai e si ona alo, ma ia faafetaia ai foi le tapuaiga ma le lagolago a aiga ma uo faapea le atunuu atoa, a o alo atu ai ana tamafanau mo le taaloga i le afiafi nei.
O loo auai atu matua o le alii o Steven i Samoa mo le maimoaina ma tapuaia le taaloga a si o la alo.
Atonu i se taimi lata mai pe a mae’a le taaloga muamua lenei a le Luatua, o le a maua ai sona avanoa e faasoa ai i luga o le alaleo faasalalau i sona agaga i le taaloga o le a iai i le asō, aemaise foi o le uluai taimi ua taalo ai o se Manu Samoa, e ese mai lona soifua taalo sa masani ai i le All Blacks a lona atunuu na fanau ma soifua ane ai i Niu Sila.
