Ua sauni loia o loo tauaveina le finauga a alii ma faipule o le afio’aga o Afega e faaulu se talosaga e toe iloilo ai le faai’uga a le Faamasinoga Maualuga na fofogaina i le Aso Faraile na te’a nei, lea ua poloa’ina ai le taofia o malosi faaletulafono o faai’uga a le Faamasinoga o Fanua ma Suafa o le tausaga e 2018, le faai’uga a le faamasinoga maualuga o fanua ma suafa o le tausaga na te’a nei 2023, ma le faai’uga a le faamasinoga o su’esu’ega muamua a le faamasinoga o fanua ma suafa na fofogaina i le masina o Mati o le tausaga nei.
Ua poloa’ina ai e le faai’uga a le Faamasinoga Maualuga alii ma faipule o Afega e taofia le faatula’i ese o aiga o Leauvaa mai eleele o loo tula’i mai ai le finauga ae faatali se’i faatūina le faamasinoga o talosaga ma iloiloga a le faamasinoga o fanua ma suafa, o le faamasinoga lea e tagofia ma su’esu’e ai finauga a itu auai e pei ona faasino mai i teuteuga o le faavae o le tausaga e 2020, faapea le faamasinoga o fanua ma suafa o lea lava tausaga.
Ua poloa’ina foi i le faai’uga lea alii ma faipule o Leauvaa aemaise aiga o loo nofoia fanua o loo aafia i le finauga e taofia le toe galueaina o ia eleele i nisi atinae.
Ua faaalia e le tamaitai loia le afioga Mauga Precious Chang sa tula’i mo Afega faatasi ai ma se loia mai fafo, o le talosaga o le a faaulu e toe iloilo pe apili ai le faai’uga na aumai i le faai’uga o le vaiaso na te’a nei, o le a finauina le lē amiotonu o lea faai’uga.
Faaalia e le tamaitai loia ua faatāua e le Faamasinoga Maualuga i lana faai’uga aiātatau o tagata o Leauvaa ae ua noatia aiātatau o le nuu o Afega e ana eleele, lea sa ioe loia a Leauvaa i le taimi o su’esu’ega ma finauga faaletulafono o fanua o lea afioaga.
Mo Leauvaa ma le faai’uga ua iai nei le latou talosaga, ua faatali i le faamasinoga o talosaga ma iloiloga a le faamasinoga o fanua ma suafa, e su’esu’e atili ai le latou mau.u
O lea faamasinoga o loo taofia lona faatūina ona o loo iai tapenaga o teuteuga o le faavae 2024 ma le tulafono o faamasinoga o fanua ma suafa 2024 o le a tuuina atu i le Palemene, e iloa ai le taunuu ona faatū o lea faamasinoga.
O ia teuteuga ua pasia le faitauga faalua ma o loo galulue ai se komiti faapalemene a o lei tuuina atu i le fono aoao faitulafono mo le isi iloiloga ma le faitauga faatolu e faamautū ai le pasia poo le teena e le Palemene.
O le faai’uga ua taoto ai nei le mataupu ua ave ai le tuualalo a le faamasinoga i itu uma o lenei mataupu e faasino i pulega mamalu a afioaga o Leauvaa ma Afega ina ia tausia le nonofo filemu, a o tālia ai se aso e su’esu’e ai a la finauga e le faamasinoga o talosaga ma iloiloga le Lands and Titles Court of Appeal and Review.
