O Tom Christie lea o le a suia Ethan Blackadder lea o loo manu’a, i le fetauiga i le aso a taeao a le Crusaders ma le Chiefs i le uluai semi finals o le taamilosaga Super Rugby Pacific o loo faagasolo nei.
E foliga na o le pau lea o le suiga ua faia e le alii faiaoga o le Crusaders Scott Robertson mai lana ‘au na iai i le vaiaso talu ai i le fetauiga ma le Queensland Reds.
O le taaloga foi lea o le a atoa iai le 100 o taaloga a Robertson i lona tulaga faafaiaoga, faamauina ai manumalo e 83, fā tutusa ma faia’ina e 12. I le ‘au a le Chiefs ua toe foi ane le alii kapeteni o le All Blacks, Sam Cane i le mae’a o taaloga e lua sa ia misia ona o manu’aga,
E na o le tasi foi le suiga ua faia e le faiaoga o le Chiefs, Clayton McMillan i lana ‘au na faia’ina le Waratahs i le vaiaso talu ai, o Josh Ioane lea o le a suia le fulupeki o Eroni Narawa.
O le 5 e te’a ai le fitu e ili ai le faaili amata o le fetauiga lea i le Orangetheory Stadium i Kalaiesetete i le afiafi a taeao.
