Na saunoa le faiaoga o le ‘au a le Moana Pasifika, Aaron Mauger ua sauni tama o le ‘au e taaalo i Apia mo le uluai taimi aemaise o lea ua mafai ona aumaia le ‘au i le atunuu e feiloai foi i le autapuai ma o se tulaga foi o le a aofia i le talafaasolopito o le Moana Pasifika.
E le o toe po se lilo o loo i Samoa le ‘au a le Moana mo le la fetauiga i le aso a taeao ma le Reds i le taamilosaga lava o le Super Rugby Pacific.
O le ‘au o loo aofia ai tama taalo mai Fiti, Samoa ma Tonga ma o loo iai foi le faamoemoe o le Moana e talosia ia maua se avanoa e taaalo ai foi nisi a latou taaloga i Tonga ma Fiti.
O le uluai taaloga foi lea a le ‘au i fafo mai o Niu Sila ma Ausetalia ma o a taeao e le taumate o le a faatumulia ai le malaetaalo i le Apia Park i le autapuai a le Moana e finauina sa latou malo i le Reds.
