O lenei faigapaaga ua faamausali ai le lagolago a le Malo o Ausetalia i le atina’e ai o taaloga i le atunuu e ala lea i se maliega na sainia ma le Lakapi Samoa.
O lenei maliega o le fesoasoani a le aoga a Ausetalia le Australia Pacific Training Coalition (A.P.T.C) e fesoasoani ai i alo ma fanau o loo unaia le taleni lakapi i lalo le faamalu a le Lakapi Samoa e mafai ai ona tuuina iai avanoa tau aoaoga mo tomai ma agavaa i mataupu o loo aotauina i le A.P.T.C.
O le agaga faafetai na faaalia e le Minisita o Taaloga Afioga Seuula Ioane Tuaau i lenei faigapaaga.
“O se matati’a fou lenei mo le taumafaiga o le atina’e’ ai o taaloga i le atunuu aemaise o le soifua aoaoina o o tatou tagata.
“E pei ona silafia ai e le toatele o le vaega a le Lakapi Samoa o se faalapotopotoga oloo taimua lea ile unaia ole taaloga lakapi i Samoa.”
“E faafetaia ai lenei faigapaaga ma le aoga a Ausetalia o le a fesoasoani lea e le gata i le itu tau taaloga ae o se tasi o vaega tāua i le atina’e o atunuu e ala i avanoa o aoaoga.
“O le soifua aoaoina o alo ma fanau a le atunuu o le faamuamua lea a le tatou Malo, e mautinoa ai o loo maua avanoa mo le tomai i soo se matata mo fanau a le atunuu e aofia uma ai taaloga eseese.”
O vaega o loo aofia i lenei faigapaaga e pei o le tuuina atu lea o aoaoga o tomai faavaomalo faatasi ai ma nisi o vaega o loo faamauina i le alafua o aoaoga a le A.P.T.C.
E agai lea i le aofai o tagata uma faatasi ma i latou o iai aafiaga tumau i avanoa e aveesea ai papuipui o loo fai ma faafitauli o le atina’e o taaloga i le atunuu.
O le aoga a le A.P.T.C. o se tasi lenei o fesoasoani a le Malo o Ausetalia o loo tele lona sao i le Pasefika ma Samoa nei e le gata ina maua avanoa e aotauina ai i soo se matātā ae o avanoa faigaluega o loo mafai ona faamanuia ai le toatele o le atunuu.
