O Samoa ma nisi o atunuu e 6 mai le Pasefika lea na sainia le maliega e puipuia ai ogasami ma meaola o loo ola ai ma ua iai nei faatasi ma nisi o atunuu e 70 i le lalolagi.
O lenei maliega na sainia lea a o faagasolo ai fonotaga a Malo Aufaatasi lona 78 i le laumua o Niu Ioka i le Malo tele o Amerika.
I faamatalaga mai le Ofisa o Polokalame faaalesiosiomaga a le Pasefika poo le S.P.R.E.P. o le mae’a ai o faatalatalanoaga ma fonotaga e autu ai lenei maliega mai le tele o tausaga ua mavae, lea ua faataunuuina ai loa le sainia ai e nisi o atunuu o le Pasefika o lenei faamoemoega tāua.
O le sainia ai o lenei maliega e atunuu e fitu o le Pasefika ma o sui foi o le Ofisa o polokalame faalesiosiomaga a le Pasefika o loo i lalo o se tasi o tulafono o le UN Convention Law of the Sea i vaega tau faasao ma le faaauauina lea ona mataitu o meaola o loo ola i le sami.
Na momoli le faamalo a le Faatonu a le S.P.R.E.P. Sefanaia Nawadra i lenei laasaga ua agai ai atunuu o le Pasefika e fesoasoani lea i le puipuia o ogasami o le Pasefika mo le lumanai o fanau i aso o i luma.
“E faamalosiau pea lava le tautua a le ofisa lenei i atunuu o le Pasefika ina ia finauina pea le puipuia saogalemu o ona ogasami e pei ona avea ai ona ogasami ma nofoaga i le tele o figota o loo ola ai faatasi ai ma amu ma aau.”
Na faailoa foi e Nawadra o lenei maliega e auga lea i le puipuia o ogasami i le Pasefika ae peitai o le tele o ogasami o loo soona fagotaina ma faaleagaina e o tatou lava tagata.
Mai lipoti a le Malo Aufaatasi o lenei maliega e aofia ai nisi o vaega o auaunaga ma faamaumauga o ogasami ma figota o loo iai.
O nei vaega uma e mafai ona faatino ai le aoina o faamaumauga i le tulaga o loo iai ogasami aemaise polokalame ma matafaioi o loo galulue ai ina ia mautinoa le mafai ona foia o vaega ina ia saogalemu vaega nei o le siosiomaga.
O atunuu o le Pasefika ua mae’a sainia lenei maliega e aofia ai Federate State of Micronesia, Palau, Fiti, Republic of the Marshall Islands, Atu Solomona, Tuvalu ma Samoa.
