O le itumalo faapalota o Vaimauga Numera 4 ua faamalieina le komiti faatonu o le poloketi tasi le miliona ia latou lipoti o le su’eina o tusi ma le faaaogāina o le miliona lona lua, ma ua sainia ai le maliega mo le amata faamatuu iai o vaegatupe o le miliona lona tolu.

Ua to’afā ai nei i le itumalo o le Vaimauga Numera 4 itumalo palota ua maua vaegatupe muamua o le miliona lona tolu, ae o loo tālia e le komiti lipoti o le su’eina o tusi ma lipoti o le faaaogāina o seleni mo isi itumalo e 47 e le’i maua ni seleni o le miliona lona tolu.

O le Aso Lua o lenei vaiaso na sainia ai le maliega e sui o le komiti o le Fono Faavae a Vaimauga 4 ma le Minisita o Tupe ma le Minisita o Tina ma Tamaitai Atina’e o Afioaga ma Agafesootai o loo vaaia lea poloketi a le malo.

Ua toe fā masina o loo totoe ona mae’a lea o le tausaga faaletupe o loo faagasolo nei lea o loo iai ma vaega tupe ta’i miliona a itumalo palota e 51 mo le tufatufaga lona tolu, a o olioli mai le tala o le tupe fou a le malo o le a faataoto ai le tufatufaga o le miliona lona 4 ma le faamae’aina o vaegatupe o le miliona muamua lea sa na o le ta’i luaselauafe tala na tufa e amata ai ofisa ma totogi o tagata faigaluega faapea alauni o sui o komiti o Fono Faavae.