Na saunoa Tom Coventry, le faiaoga lagolago o le Moana Pasifika, ua faalototeleina i latou i le malo a le ‘au i le Fijian Drua i le faaiuga o le vaiaso i le taaloga na faia i Melepone.
Peitai na ia faailoa foi e 7 home games a le ‘au i nofoaga eseese e 6 ua faatulaga mai mo le taamilosaga, ona o le leai o so latou lava malae poo se home stadium.
O le taamilosaga talu ai na toleni ai ma taaalo i le malae i Mt Smart ae o le tausaga nei ua toleni i le malae i North Harbour.
Peitai e lē mafai ona taaalo ai ona o ni tulaga tau le mutia e pei ona faailoa e Coventry.
Na ta’ua foi i le lipoti le tali ane a le faatonu o malae i le Pulega a Aukilani, James Parkinson ina ua fesiligia e le One News i le tulaga o le malae lea e foliga o loo talafeagai mo taaloga.
Fai mai Parkinson e iai le eseesega o le vaaiga i le malae ma le faatinoina ai o se taaloga.
O loo faaauau pea la le folauga a le Moana e aunoa ma so latou malae mautu.
