Ua toe faia nei sailiga a le Komiti Faafoe a le asosi o tama ma teine tuai o le Malisi i Samoa, mo se isi e avea ma Pule o le Kolisi o Sagato Iosefo, ina ua talia e le Komiti Faafoe o le pulega o le a’oga le faamavaega tusitusia a lē sa avea ma Pule.
O lea faamavaega ua taotao tua mai i le tuana’i o vevesi a nisi o fanau a le kolisi ma ni fanau a le kolisi o Maluafou i le vaiaso na te’a nei, lea ua mae’a ona faia le leleiga ma faamuta ai le toe aliali mai o ni vevesi i le taulaga.
Ua faailoa e le Pelesetene o le asosi a le Malisi o le ta’ita’ifono foi o le Fono Faatonu o pulega o a’oga a le malisi i Samoa le afioga Tuatagaloa Aumua Ming Leung Wai, i le faatoesega tusitusia o le vevesi na tula’i mai na amata e nisi o fanau a le kolisi o Maluafou ina ua latou tau’ai le pasi na malaga ai nisi o tama a’oga a le Kolisi o Sagato Iosefo.
O lea gaioiga na tula’i mai i le aso 12 o Setema.
O le gaioiga muamua lea na tupu sosoo ai loa ma le vevesi i le Aso Gafua ua mavae lea na faaoolima ai nisi o tama a’oga o Sagato Iosefo i se tama a’oga o Maluafou.
O le finagalo tusitusia o le ta’ita’ifono o le komiti faatonu o pulega a a’oga a le Malisi i lo tatou atunuu ua faatoese ai i le atunuu ona o lagona ua aafia i se gaioiga na aafia ai nisi o fanau a kolisi a lua.
O se faatoesega foi lea i mātua o le tamaiti na aafia aemaise o le kolisi o Maluafou.
Ua faailoa ai e le ta’ita’ifono o Iulai na amata faagasolo ai le sailia o se pule fou o le kolisi, ma le faamoemoe o le talia o le faamavaega a lē sa avea ma pule, ua filifilia ai se tasi o alii Felela tuai sa avea ma pule o Sagato Iosefo i ni tausaga e tuana’i e na te tauaveina le pulea o le a’oga seia oo ina maua se pule fou.
O le susuga i le Felela ia Brother Kevin O’Malley e lē toe tau faailoa ona ua lausilafia e le to’atele aemaise o le lotoifale o a’oga a le Malisi i Samoa.
