Ua amatalia nei se sailiiliga ua aoao mai ai faamatalaga e ala i ni finagalo ma lagona o i latou o pulea ma galulue i le tomai tau faasalalau ma galuega faatusitala i totonu o Samoa, i le faamoemoe e faaleleia ma siitia maualuga lea tautua o loo maua ai e tagata lautele faamatalaga e le gata mo lo latou silafia o mea o tutupu, ae o ata ma isi gaioiga faatekonolosi e lagolago ai le latou pitolaau.

O le sailiiliga foi lea o le a agai i vaega o loo lape ma faaletonu ai le faatinoina o lea tautua ona o le lē lava o meafaigaluega, faapea le lē lava o tagata e iai tomai aoaoina e feagai ma le faia o lea auaunaga.

O se tamaitai o le atunuu sa faauluulu iai le vaega o a’oa’oga i tomai faatusitala ma le faasalalau i le Iunivesite aoao o Samoa, le afioga Misa Vicky Lepou, o loo taitaia lea sailiiliga faatasi ai ma le lagolago a le laulau o sui o le Komiti Faatonu o le Asosi o Tusitala a Samoa ma le faamoemoe, o le a taoto mai ai se faafanua o le tulaga o loo iai lea tomai ma lona faatinoina, ina ia saili ai ni auala e faaleleia atili ai, ma siitia maualuga lea tautua.

Faaalia e le polokalame fesoasoani a le Malo o Ausetalia le Pacific Media Assistance Scheme poo le PACMAS o loo faatupeina lea galuega, o le tausaga fou e faagasolo ai isi ana polokalame fesoasoani mo atunuu o le Pasefika i le auaunaga faasalalau ma le tomai faatusitala, ma e manaomia poo fea o loo taatia ai faafitauli, o faaletonu ma manaoga o lea auaunaga i Samoa, ina ia mafai ona saili ni auala e faaleleia ai.

O lea foi fesoasoani a Ausetalia ua mafai ai ona fausia se tusi taiala e faatonutonu ai lea galuega mo i latou o galulue ai, aemaise le mae’a fausia le tusi taiala e galulue ai le autusitala i le lipotia o mataupu mai le faamasinoga.

O le isi o fesoasoani a le PACMAS o loo galulue ai nei le asosi o tusitala a le atunuu ma le ofisa o le fono aoao faitulafono, i le saunia o se tusi taiala e galulue ai mo le tausia o le va lelei o le galuega ma lea ofisa tāua o le Malo i le lipotia o mataupu e folasia i le Palemene.