E oo atu i le $200 miliona le tino i tupe e ono manaomia e Pulega o faletalimalo i le atunuu e faaleleia ai a latou pisinisi mo turisi ae le’i toe tatala alavaa a le atunuu.

O le manatu lea a le Peresetene o le Asosi o faletalimalo i Samoa Tupai Saleimoa Vaai lea o loo fuafua e aofia i totonu o se talosaga le tino i tupe e manaomia e le Asosi e galulue ai mo le faafou ma le faatotogaina o pisinisi i faletalimalo ma fale mataaga uma i le atunuu.

E pei ona silafia e tele le aafiaga o Tupe Maua mai tagata tafafao atu i Samoa talu ona aafia le

Lalolagi i le koviti19 ma tapunia ai alavaa o atunuu eseese. O lea gaioiga ua le mautonu ai le laa a le au fai faletalimalo poo fea o le a toe maua ai seisi tupe maua ona o le faamoemoega o pisinisi nei o tagata e malaga atu i le atunuu.

Taua e Tupai i le 5 miliona lea na faimeaalofa atu ai le Mālō mo auaunaga tau turisi e na’o le pa’u lea o le fesoaosani na maua talu mai le Koviti ma e faafetaia ai le Mālō i lea foai peitai e tele nisi o vaega e manaomia ai le fesoasoani a le Mālō aemaise lava tulaga tau tagata tafafao atu i le atunuu.

“Na faailoa muamua mai o le a tatala alavaa i le masina o Ianuari, toe faimai lea ua tuu atu i le masina Iuni peitai lea ua toe faailoa mai ua tuu atu i tua ia Aukuso”.

E ui na tatala pea le tele o faletalimalo i le taimi o le pepesi o le faama’i ma o le toatele o tagata na faaaogaina o tagata lava o le atunuu e femalagai solo peitai e le lava lea e faatumau ai le totogi o vaega manaomia mo faletalimalo.