O Toese Tuuaga 37 tausaga lona matua o se taule’ale’a o loo sa’ilia nei e leoleo mo ni su’esu’ega i ni tuua’iga tau soligatulafono.

O loo aofia ai i lea su’esu’ega se vevesi na tula’i mai i le malaevaalele i Faleolo i se vaiaso e le’i mamao atu, lea o loo masalomia ai e leoleo e tusa o lipoti sa umia ai e lea tagata se laaumalosi o se fana laitiiti.

O Toese o loo masalomia foi i se gaioiga solitulafono i Vailoa Faleata lea o loo masalomia sa ia umia ai foi se laaumalosi.

E lē o faailoaina e leoleo pe na iai nisi sa aafia i le vevesi i le malaevaalele i Faleolo, ae mo le puipuiga o le saogalemu o le atunuu e afea lea nofoaga e faaee ma faatali ai pasese, ua amata faamamalu i le Aso Gafua o lenei vaiaso le siakiina uma o taavale e afea le malaevaalele i Faleolo.

Ua faaalia e le pulega o le malaevaalele ua faia lea suiga mo le puipuia o le saogalemu o tagata femalagaa’i ae faapea le saogalemu ma le malupuipuia o meatotino ma aseta a le Pulega o Malae Vaalele a Samoa.

O tagata faigaluega i le vaega o le puipuiga poo le security faatasi ai ma le lagolago a le vasega o Malu o le Malo o le a faatautaia ia siaki mo taavale uma e afea le malaevaalele faavaomalo i Faleolo i soo se taimi.