O lea ua agai le Mālō e saili ni auala e fofō ai atugaluga o nisi i le faiga ma le auala o loo gaosia ai nisi o fagumalosi i le atunuu ona o solitulafono ua tutupu ma aliali mai pea ua aafia ai nisi o tupulaga talavou, i latou e tagofia ia ituaiga ava malosi.
O le fagumalosi vodka e taua o le rover e le’o asa se solitulafono e aafia ai nisi o tupulaga ma lo latou tagofia o le rover ua iai masalosaloga atonu e iai nisi faiga o loo gaosia ai fua ina tutupu mai ai solitulafono pe telē se vaega o lea fagumalosi e faaaogaina.
I se feiloaiga a nisi o tusitala ma le Sui Palemia o le Minisita foi lea o Tiute ma Tupe Maua o loo iai ma le Komiti e pulea le ava malosi na faaalia ai e le afioga Tuala Tevaga Ponifasio ua maea se suesuega a le nofoaga faasaienisi i nisi o fagumalosi o loo gaosia i Samoa ma ua maua ai o loo maualuga se vaega poo le volume o le sipili e taua o le ethanol o loo sui a’I lea fagumalosi.
O lona tulaga faaminisita o loo iai ma le Komiti o le ava malosi ua silasila ai e tatau loa ona saili nisi auala e mafai ai ona faatonutonu le gaosia o ia ituaiga ava malosi.
Faaalia e Tuala ua iloa i faamaumauga o le tele o le sipili o le ethanol o loo gaosia ai ia fagumalosi o loo aumai mai Saina ma atonu o le taugofie le mafuaaga o le aofaiga poo le volume o lea sipili ua aumaia e lea atunuu mo le gaosia o fagumalosi aemaise lava i le ituaiga o le vodka.
O le tele o pisinisi o gaosia lea ituaiga tau ava malosi i le atunuu o pisinisi a tagata mai Asia.
