O le a amata faata’ita’i e Rwanda le faaaogāina o se tasi o tuipuipui mo le Marburg Virus lea ua maliliu ai a itiiti mai, e to’a 12 tagata i le atunuu, o le to’atele o i latou o tagata faigaluega i le soifua mālōlōina.
O Rwanda o se atunuu i le itu i Sasae o Aferika ma ua o latou mauaina le tusa ma le 700 o doses o le tuipuipui mai le Sabin Vaccine Institute, o se faalapotopotoga e faamautū i Amerika.
Fai mai o i latou e aupito sili ona lamatia i le Marburg virus o foma’i, ma i latou e fepa’ia’i ma gasegase ua aafia i lea vairusi ma o i latou foi ia o le a muamua faata’ita’i ai lea tuipuipui e pei ona saunoa iai le minisita o le soifua mālōlōina.
O le faama’i lea e vave tele le pepesi ma e tai pei o le Ebola, o ona āuga e aofia ai le fiva, tiga o maso o le tino, manava tatā, faasuati ma i nisi tulaga e oo lava ina maliu ai ona o le tele o le palapala e lusi mai le tino.
O le ulua’i taimi lea ua maua ai le vairusi i lea atunuu ae lē mailoa pe na mafua i se ā ona ulufale atu i le siomaga.
