Ua faaali le lē fiafia tele o le Minisita o Alamanuia ma Leipa afioga Leatinuu Wayne Sooialo i ripoti ua maua mai o loo aafia tama fanau a le atunuu ma le Pasefika i ni faiga lē alofa poo le faapologa i totonu o Ausetalia i nofoaga o loo galulue faavaitaimi ai.

I ripoti a le SBS NEWS na folasia e alo ma fanau mai Samoa i se suesuega a le Senate a le Mālō o Ausetalia. Ua faailoa ai e Alex Muese ma Talipope Kalolo faaletonu o feagai ai ma i latou o loo tauina fua o laau suamalie i se Faatoaga tele i se pitonuu o le itu i Sasae o le Setete o Vitoria. 

O se faamatalaga a Muese i luma o le Senate ma fesoasoani iai se faaliliu upu na te faamatalaina i le gagana peretania na faailoa ai e lea alii faigaluega faavaitaimi mai Samoa le matuā faaletonu o nofoaga o loo nonofo ai aemaise foi e galulue i le mutinitini ma le vevela o le la. O nisi taimi e faigaluega i le toulu o uaga poo le leaga o le tau ae maua totogi vaiaso e na’o le $300 tala Ausetalia.

Sa faapea o ia a taunuu atu o lona totogi e 25.00 tala Ausetalia i le itula peitai e le’o le tulaga lea o tupu ua manatu ai e sili ona toe foi i Samoa.

Ua faaalia e le ripoti i le SBS o le masina o Aperila o le tausaga nei o le a faalauiloa ai le tuufaatasia uma o le polokalame o galuega faavaitaimi a Ausetalia i lalo o se polokalame e tasi ua taua o le Pacific Australia Labour Mobility Scheme. O le suiga o le a siitia ai tulaga o le vaaia o tagata faigaluega ma mautu ai foi o latou avanoa e faaleleia atili ai lo latou puipuiga aemaise o le vaaia lelei o i latou. 

E le gata ina faailoa mai ia faiga faapologa a Kamupani ma i latou e ana faatoaga o loo faafaigaluegaina tagata mai le atunuu faapea isi motu o le Pasefika o loo lavea i le polokalame ae ua feagai foi Samoa ma nisi o faafitauli ogaoga i le aafia o va faaleaiga i matua ma fanau ona o ia lava galuega.

O ni gaioiga na faailoa e le Minisita e le talafeagai ma e tatau ona fai iai se faaiuga poo se suesuega i faamatalaga nei ua ripotia mai mo le saogalemu o tama fanau a le atunuu.