Ua faamauina mai e le Matagaluega o le Soifua Maloloina o le Aso Lulu 30 Mati 2022, na maliu ai se tasi o le atunuu ma le Koviti-19 talu ona pepesi i tua le faama’i.
E tusa lea ma le 13 aso ua mavae talu mai le Aso 17 o Mati lea na mua’i maua ai le tagata muamua mai le lautele o le atunuu. O le ua maliu o se tamā, 67 tausaga le matua ma o lo’o fa’amauina e tele nisi o gasegase tumau o lo’o a’afia ai o ia.
Na auina ane o ia i le Falema’i Fa’aitumālō i Lalomanu ananafi ma maliu ai lava. O le amanaia ma le fa’aaloalogia o le aiga o le tamā ua maliu, o le ala lenā e le’o so’ona fa’alauteleina ai fa’amatalaga au’ili’ili mo le ua maliu.
O le taimi nei ua oo atu i le to’a 1,665 le aofaiga o le mamalu o le atunuu ua aafia i le Koviti talu ona pepesi i tua le faama’i ma e na’o le to’a 1,353 o loo aafia poo active cases.
