O loo galulue malosi le vaega tau soifua maloloina a le Etu Pasifika Canterbury ina ia faamautinoa ua oo le feau i aiga uma Pasifika i Niu Sila, ina ia faatāua lo latou puipuiga mai faama’i e omai faatasi ma le tau malulu o lenei tausaga, e ala lea i le faamautinoa ua fai o latou tuipuipui.
A o faagasolo le faiga o tuipuipui i le vaiaso na faatāua ai le World Immunisation Week, lea sa faatautaia e le Etu Pasifika Canterbury, e maeu le tali mai o tagata, auā e tusa ma le 480 i latou na faia ai o latou tuipuipui.
O le Etu Pasifika o se auaunaga e taulai i le uluai tausiga o le soifua maloloina o le tagata, le soifua maloloina ma le soifua manuia o le mafaufau, ma o loo iai o latou nofoaga eseese i totonu o Aukilani, o Aukilani i Saute ma Kalaiesetete.
E tele auaunaga fesoasoani eseese latou te faatinoina, e tauala mai i foma’i Pasifika ma isi uma o loo iai tomai faapitoa i le auaunaga tau soifua maloloina, o i latou ua a’oa’oina lelei ma iai tomai e galulue ai e fesoasoani atu i tagata lautele, faapea i latou o loo galulue o ni faatonufolau ina ia malamalama tagata lautele i suiga ma fesoasoani eseese e maua.
O le feau lea o loo faamanatu mai pea e le Clinical Director a le Etu Pasifika Canterbury, Dr Ah Mu, e tatau i tagata uma ona agai e fai o latou tuipuipui a o faasolo ina ma’ati’ati mai le tau malulu, e pei ona iai lea aso i Kalaiesetete, i le lolofi atu o tagata aemaise le vaaia o aiga o agai atu e lagolago lenei polokalame tāua.
O tuipuipui sa faia ai, o tui e puipuia mai ai faama’i e pei o le Koviti-19, le misela, mami ma le rubella (MMR) faapea le tuipuipui mo le fulū, ma sa faataunuu i le nofoaga o le aoga a le Te Aratai College.
Sa auai atu i lea aso le vaega a le Te Whatu Ora Pacific Health Te Waipounamu, ma na saunoa le Regional Director, Pacific Health, susuga ia Erolia Leinatioletuitoga Eteuati-Rooney, pe a fua atu i le tulaga lelei na tulai mai i lea aso, ua iloa ai e aogā tele la ma tāua ituaiga faama’ite nei i tagata Pasifika.
O ni faiga o loo saunia ai le tausiga o le soifua maloloina ae ogatusa ma alafua poo agatausili e masani ai tagata Pasifika, le alofa ma le faaaloalo, le faatāua o aiga, le tautua, ma uiga fetausia’i.
Tele vaaiga matagofie i lea aso, e lē gata i laufofoga fiafia ma se siomaga faaleuo, sa maua foi taumafa, tātā musika ma mea eseese sa faafiafia ai fanau, o nei fuafuaga uma sa taulai ina ia mafai ona auai atu aiga i mātua ma fanau ma ia tofu sao tagata uma.
Saunoa Erolia, o le tāua lea o le matafaioi a falemai laiti nei o loo galulue ai tagata Pasifika mo le tausiga o le soifua maloloina o latou lava tagata Pasifika, auā ua latou malamalama lelei i auala e sili ona lelei e faaoo atu ai lena tausiga, e pei foi la ona faatino ai e le Etu Pasifika Canterbury lea faamoemoe ma iu ai i se taunuuga matagofie.
O lea la ua tapena atu foi le Etu Pasifika Canterbury mo le isi latou polokalame faama’ite, ua fuafua e faataunuu i le masina fou o Iuni.
Puna o Faamatalaga: https://www.tewhatuora.govt.nz/corporate-information/news-and-updates/keeping-our-pacific-families-well-this-winter/
