Ua poloaina e le Faamasinoga Sili le afioga i le Fofoga Fetalai susuga Papalii Li’o Oloipola Ta’eu Masipa’u e faatauto loa sui faipule filifilia e toatolu mo nofoa faaopoopo o tamaitai mo le paeaiga lona 17 a le Palemene.
O le faaiuga lenei na fofogaina e le afioga i le Faamasino Sili, Satiu Simativa Perese ina ua lau le faaiuga o talosaga a le afioga Aliimalemanu Alofa Tuu’au ma Faagasealii Sapoa Feagia’i faasaga i le faaiuga a le Fofoga Fetalai na le faatautoina ai i la’ua i le mae’a ona saini le Ao o le Malo i le pepa o le filifiliga i le mae’a o palota laiti ia Novema o le tausaga na te’a nei.
Na faailoa e le Fofoga Fetalai i lana faaiuga e talu ai o loo i luma o le faamasinoga se mataupu ua lu’i ai e le sui tauva tamaitai le afioga Toomata Norah Leota le faaiuga a le Komesina o faigapalota i le filifilia o nofoa faaopoopoo a tamaitai, ua ia lē faatautoina ai ia sui faipule filifilia ae se’i tālia muamua se finagalo o le faamasinoga.
I le faaiuga na tolaulauina i le Aso Lulu na faaalia ai e le Faamasinoga Sili, o le lē faatautoina o Aliimalemanu ma Faagasealii ua lē tausisia ai e le Fofoga Fetalai ona tiute faaletulafono aemaise o loo aiaia i le Faavae. O le talosaga a le Fofoga Fetalai e ala i lana loia a’o faagasolo taualumaga o faamasinoga i le talosaga a Aliimalemanu Alofa ma Faagasealii Sapoa faapea Toomata Norah, ina ia auai i suesuega o ia mataupu ua aumai le faaiuga ua teena le talosaga.
Sa talia lava e le faamasinoga le auai o lana loia a’o faagasolo suesuega o ia mataupu peitai o lea faatoa aumai le faaiuga i le talosaga e fia auai ina ua fofogaina faatasi ma le iuga o ia finauga faaletulafono.
