Ua toe lua vaiaso amata le Fono a Malo o le Taupulega, ma ua iai le talitonuga ua talafeagai le taimi o totoe o tapenaga, ma le poloa’iga a le Faamasinoga Maualuga ua tuuina atu i le pisinisi tuma’oti o le Samoa Global Shipping ina ia tuuina atu pusaoloa a le faalapotopotoga o le taaloga soka a Samoa, o loo aumai ai ni oloa e faaaogā i tapenaga a lea faalapotopotoga tau taaloga i le atunuu mo le taligamalo o le Fono a Malo o le Taupulega.
O ni oloa e faaaogā i le faletaalo o loo i le Apia Park o le a faia ai se tali faaaloalo a le malo o Samoa mo ta’ita’i o malo ma latou usugafono.
I le talosaga a le faalapotopotoga soka sa tuuina atu i le Faamasinoga Maualuga i se tulaga faanatinati mo le faia o se poloa’iga, na faailoa ai e le loia a le kamupani o le Samoa Global Shipping, e 47 afe 300 tala o loo nofo aitalafu ai le faalapotopotoga soka i nisi o pusaoloa na aumai ai foi ni a latou oloa ia Oketopa o le tausaga e 2021, ma o le mafuaaga lea o le taofi e lē avea iai a latou pusaoloa e lua na aumai ai oloa ma ana tapenaga o le Fono a Malo o le Taupulega ona e tatau ona faamamā muamua le aitalafu.
O folasaga sa tuuina atu e loia a le itu tagi ma le itu a le kamupani na malilie ai e ave loa pusaoloa o loo taofi auā ua mae’a ona totogi, ae avanoa le kamupani e tuuina atu i le faamasinoga sana talosaga e finauina ai le faaola atu o le aitalafu e silia i le 47 afe a le faalapotopotoga soka a Samoa.
O le maliega lea na faavae ai loa le poloa’iga a le faamasinoga ua tatau ona tuuina atu i se taimi vave pusaoloa a le faalapotopotoga soka a Samoa sa taofia.
