O le 83 o soifua na fano i Samoa i le pepesi o le faama’i misela e to’atele i fanauiti, o se aofa’iga to’atele ma e lē o toe fia oo iai lo tatou atunuu i mafatiaga o mātua ma aiga i le to’atele foi o fanauiti na maua i le misela i lea taimi faigatā.
O le māfua’aga lea o le toe faataalise mai o se faasilasilaga faalaua’itele mai le Matāgaluega a le Soifua Mālōlōina i Samoa ua logoina ai mātua i le tatau ona faia o tui e puipuia ai fanau mai lea faama’i, aemaise fanau e i lalo o le 2 tausaga le matutua poo i latou ua 12 ma le 15 masina le matutua.
Ua lipotia le siitia o le numela o fanauiti i Niu Sila ma Ausetalia ua maua i le misela ma o le māfua’aga lea o le fautuaga ua aumai faalaua’itele e le Matāgaluega o le Soifua Mālōlōina i lo tatou atunuu.
O atunuu ia e lua e pei ona silafia o loo tele ina malaga iai o tatou tagata, ae o tagata foi mai ia atunuu o loo malaga i Samoa, o se auala e vave ona feavea’i ai ma le vairusi o lea faama’i.
Ua faailoa e le soifua mālōlōina o le lalolagi o le misela o se faama’i e tugā ona āuga pe a oo ina tigāina ai se tagata aemaise lava i fanauiti, ma e ono mafai ona fano ai le ola ma le soifua.
