O se lipoti mai le tala i taaloga a le 9News i le aso ananafi ua faailoa ai o loo faamoemoe le Sydney Roosters ia faaauau pea ona iai ni faafaigata poo struggles a le Wallabies i le stage faavaomalo i nai vaiaso o lumanai.
Mafua lea manatu ona ua ta’ua o loo faamoemoe le kalapu ina ia manaomia ane loa e le Iuni lakapi a Ausetalia le alii taalo o Joseph Suaalii ina ia faamatuu ane ia fetaui ma le taimi o le ipu o le lalolagi ia Setema.
E pei ona silafia ua lua lelei faia’ina a le Wallabies i taaloga talu ai na fetaui ai ma Aferika i Saute ma Argentina ae lē o toe mamao faia taaloga ma Niu Sila.
Ua mae’a ona sainia le konekarate e Su’aalii e sui mai ai i le iuni ae se’i vagana ua mae’a lana konekarate i le Roosters i le faaiuga o le taamilosaga i le tausaga fou 2024.
Na ta’ua i le lipoti e matuā ova ma le fiafia le Roosters pe a mafai ona faamatuu Su’aalii i le faaiuga o le taamilosaga lenei ina ia fetaui ai ma le Ipu o le lalolagi.
O le latou talitonuga e pei ona faailoa i le tusitusiga o le tupe tele o loo faaalu ia Su’aalii e mafai ona faaaoga i se isi faiga e sili atu e toe faaleleia ai le latou laina i luma ma sailia ai sa latou ‘afa lelei.
O loo feagai foi le Roosters ma lu’itau i le taamilosaga o loo alu ma o loo iai le avanoa latou te misia ai le finals o le taamilosaga.
