O le maualuga faatagaina o le pue e mafai ona faia e se tama taalo i le taaloga o le lakapi, o se mataupu lea o loo eseese ai finagalo faaalia o tagata i luga o upega tafailagi ae o le asō ua aliae ai se lipoti i le Stuff ua ta’ua ai e le Ofisa Sili o le World Rugby, Alan Gilpin o loo iai le fuafuaga e mulimulitai i le faataitaiga a le Rugby Football Union i le toe tusia lelei lea o tulafono e faatatau i le taaloga auā o se tasi lenei o mataupu o loo eseese ai foi finagalo faaalia o le autaaalo.
O le faaiuga ua faia e le Rugby Football Union poo le RFU e faasa pue i luga atu o le ogamanava tulou poo le waist ua faailoa ai le lē fiafia o nisi.
Fai mai Gilpin o le taimi nei o loo vaavaai ina ia faamautinoa e tulaga tutusa uma le maualuga o le pue faataga i vaega uma o le taaloga aemaise foi i taaloga faapolofesa.
Fai mai le faauluuluga o lenei faaiuga o se mea e ao ona fai auā e moni e manaia ma faafiafia tagata le taaloga ae ao foi ona silasila i le saogalemu ma le malupuipuia o tama taaalo.
O loo feta’ua’ina o le a iai se aso e faataunuu ai se fonotaga e faamautu ai loa le sa’o o lea mataupu.
