E ui i le tulaga lē mautonu i le manatu o le to’atele e faatatau i le lumanai o le faia’oga ulu o le All Blacks, Ian Foster ma le NZ Rugby ae o loo tumau pea le finagalo o le faia’oga e faatino lona tulaga o ia o le faia’oga o le ‘au i tapenaga mo le isi taaloga o le a sosoo ai ma le ‘au malosi a Argentina.
Na lipotia e le RNZ i le asō e lē o mautu mai se faamatalaga mai e faauluuluga o le NZ Rugby Mark Robinson i le mataupu e faatatau i le faia’oga. Na pau lana faamatalaga e faapea o le a fai mai se faasilasilaga a le pulega i le vaiaso nei ma o le faai’uga i le lumanai o Foster o se faia’oga o le a tuu i le faitalia a le fono faatonu poo le Board. Fai mai Foster i le lipoti lava lea o loo sauni ia e faamaopoopo le ‘au mo le taaloga i le faai’uga o le vaiaso fou se’i vaganā ua faailoa atu se isi faamatalaga ese.
E to’atele tama taaalo sa iai muamua i le ‘au ua valaau i le NZ Rugby ua tatau ona faataatia ese ni o latou eseesega o iai ae lagolago le faia’oga o loo tu i le foe i le taimi nei aemaise o tama taaalo.
Na manumalo le All Blacks i le la taaloga mata’ina ma Aferika i Saute i le taeao ananafi i ‘ai e 35-23. O le aso 27 o le masina nei le fetauiga ma Argentina i Kalaiesetete.
