O le aoauli nei na maua mai ai lipoti i Samoa, i se tamai vaalele, o loo iai le matega o le ituaiga o le Ultralight Land/Sea Craft e na o le toatasi le tagata e alu ai, na pa’ū i se vaega o le gataifale o Vaitele.

E toatasi ua lipotia mai ua maliu ai ma ua avatu lona tino maliu i le falemai i Motootua, ae o loo galulue pea le vaega o leoleo e tau avane i luga vaega o le tino o le vaalele ma saili pe iai se isi tagata na aafia ai pe na o le toatasi lea ua maua lona tino.

I se lipoti mai le sui o le Radio Samoa, le afioga Galumalemana Tipi Autagavaia, o gatai o Vaitele i tua ane o le kamupani a le Blue Bird i le vaega tonu o loo iai le lagisi e eli ai le oneone a le kamupani a Ah Liki lea na tupu ai lea faalavelave.

O se tasi o tamaitai tusitala na faatalanoa mai e le sui o le Radio Samoa, na ia ta’ua ai nisi o lipoti a i latou e faigaluega latalata ane i lea vaipanoa, sa latou vaaia lava le tamai vaalele lea i le aoauli o felelea’i faataamilo ai lava i le ogasami lea se’ia oo ina vaaia ua tifa ifo ma pa’ū ai loa.

O se taimi mulimuli ane o le a toe iai se isi lipoti auiliili o lenei faalavelave mai le sui o le Radio Samoa i ana talafou, ma faamautinoa ai foi le suafa ma le tagatanuu o lē ua lipotia mai ua maliu ai.