O se faamoemoe sa fau ao fau po ae o lenei ua toe o se aga ona faatini lea o le moemitiga a alii ma tamaitai sa a’otauina i le Kolisi o Samoa, o i latou ua nopia’i nei ma avea Niu Sila ma o latou atunuu e aumau ma galulue ai, le SCOPA NZ, e pei ona tapena ai mo le faamanatuina o le 70 tausaga talu ona faavae mai lenei kolisi, le Kolisi o Samoa i lona laumua i Vaivase Tai i Samoa.
E le o se taimi muamua lenei ua faamanatu ai e le SCOPA nisi o tausaga iloga e aulia e le kolisi, peitai o le toe faamanatu ai o le 70 tausaga talu ona faavae mai le Kolisi a Samoa, na saunoa le susuga i le Peresitene o le SCOPA NZ, le afioga Leaupepetele Tala’i Jr Lene, ina ua fesiliga e le sui o le Radio Samoa, “O se avanoa e mafai ai ona toe mafuta faatasi teine ma tama tuai sa aotauina i le Kolisi o Samoa e faasoa ma faaolaola le olaga tautua auā ni fesoasoani mo le Aoga aemaise galuega faatino a le SCOPA NZ.”
O le SCOPA o le igoa lea o le asosi aoao a teine ma tama tuai uma na a’ooga i le Kolisi (Samoa College Old Pupils Association) e pei ona lauiloa ai, peitai o le SCOPA NZ o loo faasino tonu atu i tama ma teine tuai o le SCOPA ua aumau nei i soo se tafa o Niu Sila, e pei ona iai sui mai le Motu i Saute o Niu Sila, o le laumua i Ueligitone ma ona itumalo tuaoi, aemaise lava i le aai tele i Aukilani.
E le o maua tonu le tausaga na faavae ai le SCOPA NZ, peitai e iai nisi o sui auai o le asosi a le SCOPA NZ o loo iai pea i le taimi nei, ae sa iai foi i le asosi i le tausaga e 1974, lona uiga ua ova atu lava i le 50 tausaga talu ona faavae le SCOPA NZ.
E pei ona muai ta’ua, o loo ta’ape solo i vaipanoa eseese o Niu Sila i latou o loo velo’aso i meafai a le asosi mai lea taimi i lea taimi, ae i se saunoaga mai le susuga i le Peresitene o le SCOPA NZ, e latalata lava i le 200 alii ma tamaitai o loo auai lava i meafai a le asosi i taimi uma, e ui e iai le talitonuga, o le vavamamao o nofoaga i totonu o lenei atunuu telē, e ono le faigofie ai mo nisi o sui ona maopoopo mai i taimi uma i meafai a le asosi.
Saunoa Leaupepe, o le SCOPA NZ o le asosi mo alii uma ma tamaitai tuai sa a’otauina i le Kolisi o Samoa, ma e tatala lava le avanoa i soo se tasi o i latou uma nei e auai mai ai ma avea ma sui o le SCOPA NZ.
E pei lava o isi uma asosi e faatulaga, e faapena foi le SCOPA NZ, ua mautu le latou laulau-a-tofi o loo faauluulu i ai meafai uma a le SCOPA NZ, ae o loo aiaiuli lava ma lagolago malosi totino matutua, o loo latou fai le faiva o le faufautua ma tuualalo i soo se fuafuaga e tapena i ai le laulau-a-tofi, o nisi o i latou o loo aumau i Aukilani nei faapea i Ueligitone.
O le anavatau poo le matua tauave a le Kolisi e pei ona pipii i lana pine o le togiga, “Atamai e Tautua mo Samoa”, ma o le manulauti lava lena o loo tauave pea e tama ma teine ua iu mai le kolisi ma ua nopia’i i atunuu ese, ae iai lava le agaga e fia tautua pea mo lana a’oga aemaise foi lona atunuu o Samoa.
E tele ni polokalame ua faataunuu e le SCOPA NZ talu ona faavae mai e tusa ai o se toe tomānatu a le susuga i le Peresitene.
Na saunoa Leaupepe, “Mai le 5 tausaga talu ai sa faia le Book Drive i le 2019 na faatau ai Tusi Aoga mo le Kolisi o Samoa ina ua talosaga mai le Komiti Faatonu ma le Pule Aoga i le manaomia o ni Text Books e faaaogā e tamaiti ona e lē o lava Tusi.
“E lata i le NZ$16,000 le tau atoa o Tusi sa mafai ona tuuina atu e le SCOPA NZ mo le aoga i lea faamoemoe.
“Sa faapea foi ona faatino le Walkathon i le 2021 e fesoasoani ai i galuega faatino a le Kolisi o Samoa e ala i le faaleleia o faleaoga ma nisi o galuega, ma sa foai atu ai e le SCOPA NZ le NZ$60,000 mo lea galuega.
“I le vaitaimi o le Koviti sa mafai ona fesoasoani le tatou SCOPA NZ e ala i le faatinoina o Tuipuipui o le Koviti i le Maota Samoa (Novema 2021), Samani Pulepule Hall (Aperila 2022) ma Otahuhu Rugby Club (Novema 2022), ma sa avea foi o se avanoa e maua ai se seleni na mafai ona foai ma le Kolisi o Samoa e fesoasoani i meafai a le aoga e NZ$20,000 na faaoo atu i le taimi o le laugatogi ia Tesema 2022.”
Na saunoa Leaupepe, “O le polokalame o le faamanatuina o le 70 tausaga o le Kolisi o Samoa e pei ona tapenaina e le SCOPA NZ, ua fuafuaina foi e faailo ai ma amanaia sui matutua o le asosi i Niu Sila nei, o i latou sa lagolago pea ma fesoasoani i meafai a le SCOPA NZ i le 5 tausaga talu ai, e tala masinei ai foi le 70 tausaga lenei ua faamanatu.
“E tele galuega sa faatino e amata mai i le 2019 ma ua tatau ma talafeagai ai se faaaloalo mo tino matutua sa tausagi mai lava e taumafai i faamoemoe sa galulue iai le SCOPA NZ auā le Kolisi o Samoa ma le Community i Aukilani nei.”
Mo le laulau-a-tofi a le SCOPA NZ i le taimi nei, talu mai le latou AGM sa faia ia Ianuari o le tausaga lenei 2023, o lea ua tulai mai ai:
Peresitene: Leaupepetele Tala’i Lene (Class 1995); Sui Peresitene: Mao Gladys Youssef (Class 1983): Failautusi: Pai Hiku (Class 1990); Sui Failautusi: Patricia Toilolo (Class 1990); Teuoloa: Travis Leilua (Class 2008); Sui Teuoloa: Salome Fouvale (Class 1998).
O loo i le pito i lalo le Polokalame mo le faamanatuina o le 70 tausaga o le Kolisi o Samoa e le SCOPA NZ:
Aso Faraile, 2/6/23, 3pm – Lotu Faafetai ma le Feiloaiga o le 70 Tausaga i Malaeola
Aso Toonai, 3/6/23, 7am – Faamalositino i le Manukau Tennis Court ma le Mālū o le Taeao, tapenaina e le Maketi Samoa
Aso Toonai, 3/6/23, 6pm – 70th Anniversary Dinner i le Due Drop Event Centre Manukau
Manuia tele le Faamanatuina o lou 70 Tausaga Kolisi o Samoa!!
