Tusia: Maina Vai

I le alafai mai ai ananafi o le Puleaga Faaakiepikopo Samoa -Apia i le tala faanoanoa i le tuumalo o le Afioga ia Patele Lafaele Muliau Matulino Stowers i Niu Sila. 

Na vaaia le gasolo  i luga o le social media o upu alofa ma faamaisega, o tomanatunatuga  a le toatele ua latou lausilafia Patele i soo se tafa o lana galuega faaositaulaga. Mai lava i lana Matagaluega ma le Vikaliatu, i ona tofiga i isi auaunaga i le Puleaga Faaakiepikopo Samoa – Apia, o ana polokalame o le “Saili Faalumaga i le UPU’… i le Upumana TV i Aso Lua taitasi ma le tele o isi tiute fai o Patele sa galue ai.

O le aso sa maua ai se faatalanoaga  ma le Sui Taitai o le Puleaga le Afioga ia Patele Pio Galuemalemana ina ua fesiligia i le soifua auauna o Patele a’o galue ai i Samoa nei.

“O Patele Muliau o se faifeau ua iloga i le Ekalesia lona tulai mai, e talavou ma laitiiti, ae ose faifeau na muamua lava faaea i tofiga maualuluga o le Ekalesia e le Akiepikopo.”

Na soifua mai Patele Muliau i le aso 17 o Ianuari, 1975, ae na faauuina ma Ositaulaga faatasi ma Patele Tietie Fonoti Siatulau  i le aso 29 o Me i le tausaga e 2004 e Lana Afioga ia Akiepikopo Alapati Lui Mataeliga.

O ona afioaga o Lano, Vailele ma Fasitoouta, sa aoaoina o ia i le aoga maualalo a Malisi i Lotopa ao lei ulufale atu i le Kolisi o Sagato Iosefo ma agai ai loa e aoaoina i le Seminalio i Fiti  (Pacific Regional Seminary). Sa avea o ia ma Sui Taitai Ulu o le kolisi o Sagato Iosefo i le tausaga e 1994.

O lona tausaga i le Seminalio i Fiiti na’o ia lava le Samoa i lea taimi, ma na sili aoao Patele i le Vasa Pasefika atoa i le Seminalio lea i Fiti.

Na faaalia e le Sui Ta’ita’i e tulaga ese lava le galue a Patele i le faatinoga o lona tofiga ma lona Valaauina…” E ese mai lava Patele i faifeau…e iai ana metotia fou…e pito laitiiti ae o tofiga na ia umia e le itiiti ai lana galuega na fai”.

E maliu nei Patele o avea o ia ma Sui Epikopo o le Vikaliatu a Sagato Mikaele le Alekagelo  Leauvaa ma e atoa i le aso 7 o le Aso Gafua o le vaiaso o lumanai nei le tausaga talu ona avea ma Sui Epikopo o lea Vikaliatu. O ia foi o le faatonu o Tupulaga Talavou mo le Puleaga, sa faiaoga i le Kolisi Faafaifeau i Moamoa atoa ai ma Matagaluega sa ia tausia i le taimi lava e tasi.

“E lauiloa Patele i ana semiar i le Tusi Paia, atoa ma aoaoga a le Ekalesia, e tele matagaluega sa ia tauaveina ona o le tele o ona agava’a”

Na taua foi sa iai le taimi na malaga ai Patele i Trinidad mo aoaoga faalautele atoa ai ma nisi fuafuaga a le Ekalesia.

Na galue fo’i i le Kolisi o Sagato Iosefo i Alafua o lona tiute sa ia vaavaia ai le tulaga tau le amio i totonu o le kolisi ma tauave ai ana mataupu.

“Na toefo’i Patele e galue i le Kolisi sa aoga ai o lana lea tautua e faafetaia ai le Kolisi sa aoaoina ai o ia”

E lauiloa Patele i Tupulaga talavou i lona tulaga o le Faatonu o Tupulaga Talavou a le Puleaga ua loa tausaga o ia umia.

“E anoanoa’i fanau sa nonofo ia Patele o fanau ua faaletonutonu olaga ma ua le mafaia e matua sa nonofo ia Patele…E saua…ae o lona agaga atoa ia gagau amio a tupulaga talavou”

Na taua e le Sui Ta’ita’i o Patele o se faifeau e Tamaoaiga i mafaufauga ma e tele lona sao ile Ekalesia….”Ose faifeau lauga lelei tele, e maati lana lauga i le Tusi Paia ma Aoaoga a le Ekalesia”

“E iu le soifua o Patele, o se faifeau e 24 itula e galue ai e le malolo, ai fo’i o le mea lea ua faatupu gasegase ai….tiga ona ma’i ae le faaitete”

O se molimau a le sa avea ma Sui Taitaifono o le Vikaliatau a Sagato Mikaele i Leauvaa le Afioga Tuala Puletini Tuala na ia taua ai e le’i atoa le tausaga talu ona latou mafuta ma Patele ae ua tele le suiga i lo latou Vikaliatu…

“I le tausaga poo le itiiti foi talu ai ona tauaveina e Patele le foe o le Vikaliatu lenei, ua vaaia ma iai mau e faamauina ai le suiga o le Vikaliatu lenei….It’s pastoral, spiritual,doctrinial awearness has been enlightened and the Leauvaa identity as the forerunner of the Catholic is beginning to be felt”.

Na ia faailoa foi e le gata i le Puleaga ua iloga ai lea tulaga ae o le Vikaliatu lava ia o Leauvaa…..”O gauga tao e fasia ai ‘au…e pei o ia upu e faatusa lea i si taimi laitiiti na taunuu mai ai Patele ma galue ma toe alu ese atu… ae a vaai i le suiga tele ua molimauina i lo matou faatuatua”.

Na saunoa le Sui Ta’ita’i e leo iloa tonu le taimi nei le gasegase o Patele ua maliu ai ae ose avanoa i le Puleaga e faigata tele ona faatumu pe a tilotilo i le galue a le Ositaulaga sa iai, ma lona sao mo le Ekalesia……

“O Patele e moni ai le upu fo’i lea…’E itiiti a le gamea’ E laitiiti lona soifua ae o mea na ia ausia i lana galue e le itiiti ia.

E leo mautu i le taimi nei le polokalame mo ona toe sauniga ae sa faailoa e le Sui Ta’ita’i o loo faia feutagaiaga ma lona aiga ma faamanino foi o le aso na avea ai ma Ositaulaga o le tama fanau ia a le Puleaga ua tuuina mai e aiga o la latou taulaga tagata mo le Atua e ala i le Puleaga Faaakiepikopo Samoa-Apia.