O le minisita e feagai ma mataupu tau i suiga o le tau ma malosiaga, Chris Bowen na ia faaleo le faafetai a le malo ina ua pasia i le Senate le pili lea i le vaiaso nei.
Fai mai a ia o le pasia o lea pili ua tuu atu ai se feau taua i le lalolagi o Ausetalia o loo matuai mautu lona manatu i le faaitiitia mai o kasa oona e faaleaga ai le siosiomaga, ma o loo matuai malosi foi lona manatu i le maua o ni faamanuiaga ma avanoa mo le tamaoaiga mai malosiaga toe faafou, renewable energy.
O le faamoemoe ia oo atu i le 2030 ua faaitiitia mai i le 43 pasene kasa oona e faaalu i le siosiomaga pe a faatusa i se pasene maualuga o loo iai i le taimi nei.
Taua e le minisita o le a faamalosia ai foi ma faiga amiotonu ma sa’o i faamaumauga faaletausaga e faatatau i le tau ma faamautinoa ai o finauga faalauaitele e fesoasoani e faailoa tulaga o mea i le malo ma ana faiga faaiuga.
