Ua iai se tetee ua tula’i mai i Paris faasaga i se faaaliga o le Gala sa tuufaatasia e nisi e lagolago ia Isaraelu.

O le faamoemoe lea o le Gala sa fuafua e sa’ili ai se fesoasoani tau tupe mo le militeli a Isaraelu ma e aofia ai le minisita o tupe a le atunuu o Bezalel Smotrich ma isi o le auvalaaulia.

O le tetee la ua faia tonu a o lumana’i ai se taaloga soka e faia i le malae autū a Farani i ē taaalo ai i le ‘au mai Isaraelu ma le ‘au a Paris.

Fai mai lipoti a le World News ua folafola e leoleo i Paris e silia ma le 4 afe leoleo ma le aufaigaluega a le stadium e 1,600 o le a leoina lea taaloga.

I le mae’a o le alia’e o faamatalaga e faatatau i vevesi ma tetee i Paris ua faamaonia mai ai e le ofisa o le minisita lea a Isaraelu o le a lē taunuu ona malaga ane i Paris e pei ona faamoemoeina.

O le minisita lea o Smotrich sa ia faatonuina ana vaega’au i Isaraelu ia tapena loa mo le fāoa o nofoaga i le West Bank lea e lē o taliaina e le Minisita o le va i fafo a Farani ma lona ofisa.

Fai mai a latou i le lipoti lea o faamatalaga a Smotrich ua lē ogatasi ma le tulafono faavaomalo ma gaioiga e faaitiitia ai vesiga.

E lagolago e Farani le 2 State Solution e tau fai nonofo ai pea Palesitina ma Isaraelu i le filemu.

Ua alia’e mai ia tetee i le mae’a foi o le vevesi i Amsterdam lea na lipotia atu foi e tai faapea foi le mea ua tupu ai e faatatau lava i le vevesi i Sasae Tutotonu.

Puna o Faamatalaga: https://www.9news.com.au/world/france-protests-erupt-in-paris-eve-uefa-nations-league-match-france-israel/3a77bbad-ce6f-48fa-8d36-00606786cc02