Ua mana’o le Green Party e faate’a ese Darleen Tana poo lē sa i lalo o lana faamalumaluga mai le Palemene.
Faamaoniga lea mai se tasi o ona ta’ita’i Chloe Swarbrick ma i lona finagalo faaalia ua oo i le taimi ua tatau ai ona faia e Tana le mea tonu ma faamavae.
Masina o Iulai lea na alu ese ai le tamaitai faipule mai le Green Party ma o lea o loo tuto’atasi nei peitai e lē o lava lea i le Greens ma fai mai ai ua tatau ona faaaogā le tulafono e faate’a ese ai.
O le uma ai o le palota a le patī na lafo ai loa le imeli i le faipule ia Tana ma faailoa iai, ma o le mataupu lava foi lenei na tusi ai le patī i le Fofoga o le Maota.
O le faai’uga na faailoa mai anapo o lea faato’ā faataunuu lea o le fonotaga na talo e faia i le masina o Setema, ae ona o tagi na sulu ai Tana i le tulafono o lea na lẽ mafai ai ona faataunuu i lea taimi.
O le tagi a Tana na sulu ai i le faamasinoga e tali atu ai i su’esu’ega a le Greens, o lea ua teena e le Faamasinoga Maualuga.
O le palota a le Greens ua iai nei faatasi ma le tali mai le faamasinoga, ua taoto ai nei le faai’uga o lenei mataupu i le Fofoga o le Maota.
Puna o Faamatalaga: Green Party votes to waka-jump Darleen Tana | RNZ News
