A o lei faia le palota tele a Niu Sila i le masina o i luma, o lea ua faia le palota faataitai a fanau aoga.
E tusa ma le 115,000 fanau aoga mai le 775 aoga tulagalua i totonu o le atunuu o lea o loo auai i le palota faataitai, ma o sui tauva o loo palota agai iai o sui momo’e lava e tasi ua mae’a lesitala mo le aso 14 o Oketopa.
O se faataitaiga ua fai mai le komisi o faigāpalota e avea ma avanoa e faamasani ai fanau i le faigāpalota ma o lea foi na sapalai uma e le ofisa o faigāpalota pusa palota, pepa palota faapea ai ma falepalota e agai iai.
I faamaumauga e fai lava toalaiti o tupulaga talavou e palota i faigāpalota tele a le atunuu i tausaga ua mavae.
E faatoa faailoa faaiuga o palota faataitai nei a fanau aoga i le mae’a ai ona faailoa o le iuga aloaia o le palota tele i le toe lua vaiaso o i luma.
