Ua lipotia e le CNN e 22 tausaga o se alii Palesitina na faatigāina ma fasiotia e le Hamas i le mae’a o lona faitioina faalaua’itele o le Hamas ma auai ai i ni solotetee faasaga i le Hamas i Gaza, o le faamatalaga lea mai si ona aiga.

O Uday Rabie na ave faamalosia e le autau faaa’upegaina e iai sootaga ma le Hamas, fai mai sa iai se feteena’iga na tula’i mai i le va o Uday ma sui o le kulupu lea i le masina talu ai ma sa iai lava popolega e i’u ina toe foi ane nisi o le Hamas e ave.

O le vaiaso talu ai la na tupu ai loa lea tulaga ina ua aga’i ane ni alii faaa’upegaina ma ave faamalosi Uday ma i faamatalaga a si ona uso sa faia i le CNN ua ta’ua ai na mae’a ona faatigāina ma faaoo manu’aga i lona uso ona fesoota’i atu lea o le kulupu lea ia te ia e alu ane e ave lona uso.

E tele manu’aga i lona tino ma faavave atu ai i le falema’i lea na maliu ai lava i se taimi mulimuli ane.

Fai mai le uso o Uday o le tala na fai ane ia te ia ina ua tuu ane si ona uso, o le i’uga lea o tagata uma e lē faaaloalo i le Al Qassam Brigades, o se vaega o le Hamas.

Puna o Faamatalaga: https://edition.cnn.com/2025/04/01/middleeast/uday-rabie-palestinian-tortured-hamas-intl-latam/index.html