Ua solomuli i tua ma palasi teisi i lalo le tulaga aoao tetele o le atina’e o Samoa i le mae’a o se sailiiliga ma tuu faatasia ai le lipoti mai lea suesuega a le lala o Malo Aufaatasi le UNDP.

O lea ua faailoa lea tulaga i lea lipoti na faalauiloa i le Aso Lulu o lenei vaiaso ma ua faapea mai ai, o le mafuaaga o lea tulaga i le atina’e o le atunuu ona o aafiaga mai le faama’i o le Koviti-19.

E 10 isi atunuu sa agai iai le sailiiliga o loo aofia foi i lea tulaga solo i tua o le atina’e ona o le mafuaaga lava lea e tasi. O le faalauiloaina o lea lipoti tāua ua toe faatu ai ma le laupapa faalauiloa o fuafuaga o manulauti a Malo Aufaatasi mo le atina’e, le Sustainable Development Goals poo le SDGs i luma o le nofoaga tutotonu o auaunaga eseese a Malo Aufaatasi o loo faamautu i Samoa lea ua iai nei i se tasi o maota tele i le nofoaga i Tuanaimato o loo iai fale ma malae taalo faavaomalo.

O le autu o le toe faatulai o lea faailoilo ia fai ma faamanatu tāua i tagata Samoa aemaise o auaunaga eseese i le tāua o lo latou sao i le ausia o lea manulauti, e le gata mo lo tatou atunuu a o isi atunuu o le lalolagi.