Ua tali le Palemia Christopher Luxon ma fai mai, ua ova ma le laina mea na faia e sui o le ekalesia Destiny Church.
O le mataupu lenei o lea ua su’esu’e e leoleo amioga a tagata o le Destiny Church lea na solo tetee i Te Atatu i le Aso Toonai.
O le faletusi i Te Atatu lea e faapea na faatonuina e le ta’ita’i o le ekalesia, Brian Tamaki ana tagata solo tetee e o i le faletusi e faafesaga’i ma tagata o loo i totonu o le faletusi.
Ua lipotia a o faia solo tetee nei na loka ai ma le tusa ma le 30 tagata matutua faapea fanau i totonu o se tasi o potu o le faletusi mo lo latou saogalemu.
O lea na iai leoleo i totonu o le faletusi ma taumafai e faanofo filemu mai tagata o le ekalesia, ma o loo su’esu’e nei lipoti o le faaoolima.
O ni faiga ua fai mai ai le Palemia, e iai lava le sa’olotoga e faaali ai finagalo, peitai ua mamao tele foi le mea ua oo iai faiga tetee na iai le Aso Toonai.
Ae i luga o le X, na faailoa e Chris Hipkins o le ta’ita’i o le Labour, o le faifeau ia Brian Tamaki o le Destiny Chursh, ua na o se tamaitiiti.
E ui i nei mau tusitusiga ma finagalo lē fiafia o sui o le Palemene i le Aso Toonai, ae fai mai le faifeau ia Tamaki ananafi i luma o le ekalesia i le taeao ananafi, e lagona lona fiafia i le tula’i mai o sui o le ekalesia i le solo tetee na iai.
O le fe’au o loo momoli mai i tetee nei a le Destiny Church, o le tu malosi lea e tetee i polokalame a le Pride festival, lea e faalauiloa ai ulugalii alii, ulugalii tamaitai, faafāfine ma isi.
Puna o Faamatalaga: Destiny Church protesters ‘went too far’ – Luxon | RNZ News
