Na ulufale faamalosi leoleo i se nofoaga o le drug rehabilitation centre i le taeao analeila i le mataupu o loo ua toe tatala ai nei i tua nisi o sui o kegi ma i latou o loo feta’ua’ina i fualaau faasāina ma moliaga ogaoga faasolitulafono.
O le Nga Kete Wanaga Solutions o se nofoaga e nonofo ai tagata i Dairy Flat i le itu i Matu o Aukilani lea e ta’ua i lipoti o i e totogi ai e i latou o loo tuuaia i soligatulafono, le lata i le 19 afe ina ia auai ai i se polokalame e 12 vaiaso e faia ai fesoasoani ma togafitiga e faatatau i fualaau faasāina ma le avamalosi faapea foi sauaga i totonu o aiga ma aoaoga faamatua.
O le Herald o loo ta’ua ai sa faataunuu suesuega ma le osofaia o lea nofoaga i le taeao analeila e le vaega faapitoa a leoleo ma e iai le sootaga o le suesuega lea i le mataupu o loo suesue pea nei e leoleo o loo faatalia ai se lipoti i se taimi mulimuli ane o le asō.
