Ua lē na o tagata Samoa ae ua omai faatasi le lalolalagi atoa e amata lava mai i Samoa, Niu Sila, Ausetalia, Amerika, le atu Europa, atunuu o le Pasefika, o le atu Asia ma Sasa’e Tutotonu (Middle East) e faaali le latou lagolago i le Toa Samoa.
O se vaaiga uigaese i le faagasolo ai o le taamilosaga o le Ipu o le Lalolagi a le Lakapi Liki i lenei tausaga i le telē o le sao a le Toa Samoa i le faatosina atu o tagata i le Lakapi Liki ae le gata i lea ua fesoasoani i le tele o i latou e lei malamalama lava i lenei taaloga.
E ui e lei manumalo le Toa Samoa i le Ipu o le Lalolagi ae ua aupito sili ona telē le vaega na manumalo ai le ‘au a le atunuu, e ala lea i le tuufaatasia e le Toa Samoa o tagata Samoa uma lava i le lalolagi, ua faatu e le Toa le matati’a tāua o le uluai ‘au o le Pasefika ua ausia le sailiga siamupini, ua aumai faatasi e le Toa atunuu uma o le Pasefika e lagolago faatasi ma o le Toa Samoa le mafuaaga o le toe feiloai ai o nisi aiga ua leva ona valavala.
Na faaali ai foi le fiafia o faauluuluga a le Lakapi Liki i le lalolagi ona o le Toa Samoa na mafai ai ona faaaoga e le alii Samoa ta’uta’ua i le lalolagi ia Seiuli Dwayne Johnson lana upega tafailagi e momoli ai ona alofaaga mo le ‘au a le atunuu ma ua avea ma avanoa e faalauiloa ai lea taaloga i le fia miliona o tagata.
Na vaaia foi taitai o nisi atunuu ua momoli a latou alofaaga e pei o le Palemia a Niu Sila Jacinda Ardern na tuuina atu foi ana faamanuiaga i tama taaalo a le Toa Samoa.
O se atunuu aupito itiiti peitai ua iloa uma e tagata eseese Samoa talu mai lenei taamilosaga. Na faafetaia e tama taaalo le ‘au lagolago i soo se tafa o le Kelope ma o latou ta’ua o le amataga lea o le tele o nisi mea lelei mo Samoa, “This is just the beginning”.
O lea la ua mae’a taaloga ma ua toe foi atu nei tama i atunuu o loo aumau ai ae o loo vaaia pea le faaali o le fiafia o tagata Samoa i le lalolagi atoa e ala ia latou solo tetele ma faafiafiaga.
O le isi Ipu o le lalolagi o le a faia i le 4 tausaga o i luma.
