Ua aumai i se tulaga faalaua’itele se finagalo o le ta’ita’i o le pati faaupufai o le Samoa ua Potopoto le afioga Fiame Naomi Mataafa, ua tali ai i se finagalo o le tama’ita’i Minisita o Tupe le afioga Mulipola Anarosa Ale Molioo i se lipoti a le vaega faasalalau o le Talamua.
O loo faailoa ai e le Minisita o Tupe i lea lipoti ua tuuina atu le 250 miliona sa faaaogā i galuega i le taimi o le malo tausi mo le su’eina e le ofisa o le Su’etusi Sili a le malo e su’esu’e pe sa faapefea ona faaaogā.
Faaalia e Fiame Naomi Mataafa o tupe na faaaogā e le malo tausi ina ua teena e le Palemene i lena taimi le tala faatatau autū o le tupe sa aumai i le aiaiga faaletulafono e 25 pasene, ma o loo iai foi faai’uga a le Kapeneta o loo faamauina ai auala uma na faatino i le faaaogāina o le 250 miliona.
O le tasi itu ua faailoa e le ta’ita’i o le vaega faaupufai o le Samoa ua potopoto ua iai lipoti a le matāgaluega o tupe o loo faailoa ai faamaumauga o le faaaogāina o ia tupe ae o le toe su’eina e le ofisa Su’etusi Sili o le a alu vale ai tupe i le faia o lea galuega.
O le 56 miliona sa faaalu e le faigāmalo na filifilia e le atunuu i le palota tele i se tulaga faanatinati ua tuuina atu foi i le ofisa Su’etusi Sili a le malo mo le su’eina.
