Pe tusa ma le 1000 soifua e fano i le kanesa i Niu Sila i tausaga taitasi, o le a mafai ona faasaoina pe ana faapea e nonofo i Ausetalia, e tusa ai ma se suesuega fou.
O se faaiuga lena a le alii faapitoa e mataituina le pipisi o le gasegase o le kanesa a le Iunivesete o Aukilani, Porofesa Mark Elwood, e pei ona sa ia faavasegaina tulaga o le gasegase i Niu Sila i se tusitusiga i le lomiga a le soifua maloloina a Niu Sila, le New Zealand Medical Journal.
Sa ia tusia ai, e tusa ma le 11 pasene e maualalo ifo ai le faatulagana o soifua e faasaoina i Niu Sila, pe a faatusatusa ia Ausetalia, o se tulaga sa sau ai i le 20 tausaga.
O le faatulagana o soifua e fano i le kanesa ua faasolo i lalo, ae o le eseesega i le va o atunuu e lua o loo faaauau, o lona uiga e tusa ma le 1000 isi soifua faaopoopo e fano i le kanesa i Niu Sila nai lo le mea e mafai ona iai.
O loo tusia ai, i le va o le 2014 ma le 2018, o ē maliliu i le kanesa i Niu Sila e 17 pasene sa maualuga atu ai i le itupa o tina ma tamaitai, 5 pasene e maualuga ai i le itupa o alii, pe a faatusatusa ia Ausetalia.
O le vaiaso talu ai sa folafola ai e le Minisita o Soifua Maloloina a Niu Sila, Shane Reti ia taulaiga autu fou e lima o soifua maloloina, e aofia ai togafitiga vave o kanesa, i le 90 pasene o gasegase ia faia togafitiga i totonu o le 31 aso mai le taimi lava e faia ai le faaiuga.
Faaalia e Porofesa Elwood, o taimi e faia ai togafitiga e tāua tele, ae e lē faapea o le a atoatoa ona tuuitiitia ai le vala o soifua e faasaoina i le va o Niu Sila ma Ausetalia.
Ma ia ta’ua ai, o le mea moni i le faaumiumi ai o le soifua mai le kanesa, o le vave maua lea o ona auga.
