O le a toe tapunia Samoa i le vaeluaga o le po a nanei le Aso Toanai 19 o Mati 2022 ao galulue ai le Matagaluega o le Soifua Maloloina e faia sailiiliga i le fia maua o tagata uma na latalata i se tagata ua taofia nei i le nofaoga faapitoa mo i latou e aafia i le faama’i o le koviti19 ina ua maua i ana suega i le aoauli o le Aso Tofi 17 o Mati 2022 ua pisia lea tagata i le siama o le faama’i.
O lea tagata e le’o faailoaina poo se alii poo se tamaitai ua sauni e tuua Samoa mo sana malaga i fafo ae maua ai ana suega o le Koviti ua aafia i le siama. I le faalauiloaina o tapenaga o puipuiga o le atunuu e le taitai o le malo le tamaitai Palemia Fiame Naomi Mataafa na ia faailoa ai i le lata i le 11 i le po anapo, o loo agai foi sailiiliga pe faapefea ona pisia lea tagata i le siama.
Talu ai sa lē mafai ona tuuina atu ni fesili i le maea ai o le faasilasialga faalauaitele a le Palemia e le’o mafai ona iloa poo lea tagata na malaga mai fafo i se malaga faapitoa ae o lea ua toe foi pe o se tasi o le atunuu o lea faatoa malaga i fafo ae pe o le a foi le mafuaaga o lona tuua ai o le atunuu ona ua na’o tagata e malaga o galuega faavaitaimi, o tagata e si’i gasegase, tagata nuu o isi atunuu ua toe fia foi poo se tasi o le fanau ua feagai ma ni aoaoga i atunuu i fafo.
Taua e le Palemia “O loo faatino nei e le Matagaluega o le Soifua Maloloina tulaga uma e saili ai le mafuaaga o le pisia o lenei tagata, atoa ai ma le sailia o i latou uma sa fesootai i ai ma latalata i ai. O se galuega tele lenei galuega, peitai e ao ona faatino ina ia vave ona maua i latou uma ua masalomia ua aafia, ma fai a latou suega, ma faatino galuega faasoifua maloloina e moomia mo latou.
E tusa ma le faatulagaina o a tatou laasaga mo le puipuiga o si o tatou atunuu mai le faamai, ua ou faasilasila aloaia atu ai, e afua atu i le ta o le 12 i le vaeluaga o le po nanei o le a se’e atu ai le atunuu atoa i le Laasaga 2 (Lanu moli) o le tatou puipuiga mai le Koviti 19. I lalo o le Laasaga Lua, o le a;
- Toe faamalosia ai le faaali o tatou pepa tui i soo se nofoaga e agai mai iai.
- Le faia o talifofoga i taimi uma
- Tapunia uma o aoga i le atunuu
- Tapunia o falekalapu, faleava, fale koleni ma taaloga uma.
E faaauau ona tatala faleoloa ma isi auaunaga e pei o maketi, faletalavai ma pamu penisini i taimi faatulagaina.”
E afua atu i le Aso Toonai, 19 Mati 2022, o le a see atu ai Samoa atoa i le laasaga 3 (lanu mumu) seia aulia le Aso Lua, 22 Mati 2022. Ua nao auaunaga masani mo le tali atu i manaoga sili ona manaomia e le atunuu o le a tatala poo essential services ae o galuega ma aoga uma o le a taofia seia toe iai seisi faaaliga mai le malo e faavae i fautuaga mai le Matagaluega o le Soifua Maloloina ma le Komiti o Faalavelave faafuasei.
