O se faamavaega lelei mo le Crusaders ma nisi o ona sui o le a agai ese pe afai ae o latou toe manumaloina le siamupini o le taamilosaga Super Rugby Pacific i le tausaga nei, e atoa ai le fitu o tausaga o faamanuiaina pea le kalapu.
O le taimi mulimuli foi lea mo le alii faiaoga o Scott Robertson ma alii taaalo o Richie Mounga ma Sam Whitelock i le kalapu ona o le a agai ese mo isi faamoemoega i le taaloga.
O le 2017 na amata faiaoga ai Robertson i le Crusaders ma amata mai ai lava le manumalo a le ‘au i le Super Rugby.
O lea la o le a aga atu mo lona tofiga fou i le All Blacks ae o le alii o Mounga ua sainia lana konekarate mo le tolu tausaga ma le kalapu a le Toshiba i Iapani.
O Whitelock o le a agai i le kalapu i Farani e faaauau ai lana konekarate.
O le Aso Toonai nei e fetaui ai le Crusaders ma le Chiefs i le sailiga o le ‘au o le a sola ma le malo o le Super Rugby Pacific 2023 ma afai ae toe malo ai le Crusaders, o se faamavaega lelei tele lea mo le alii faiaoga ma lana kalapu.
