Ua mālōlō litaea mai le polokiki se tasi o minisita sinia o le faigāmalo a le National i Niu Sila ma ua loa foi tausaga o auai i upufai o le malo.
O le asō ua faamaonia mai ai e le Palemia o Niu Sila Christopher Luxon le tofia o Judith Collins e avea ma Peresetene o le komisi o le tulafono a le atunuu, le NZ Law Commission.
Ua faailoa foi o le a tumau pea Collins o le faipule o lona itumalo aemaise o ona tofiga faaminisita se’ia oo i le taimi e amata ai i lona tofiga fou lea i le ogatotonu o le tausaga.
Ua ta’ua foi i lipoti a le RNZ o le faamavae o Collins o le a lē faia ai se palota laitiiti a lona itumalo ona o le a tu lalata i le taimi o le palota tele a le atunuu i le faai’uga o le tausaga.
O le 2002 na mua’i tula’i ai Collins i le tofi o lona itumalo i le palota ma ua faailoa i lipoti o ia le tama’ita’i Niu Sila aupito umi ona avea ma faipule ma iloa tele foi i lona lototele ma le lava o le silafia i ona tiutefai i le malo.
O loo ta’ua i le lipoti se tasi o ana saunoaga na faia i se faamoemoe i tausaga ua tuana’i sa ia ta’ua ai o lona to’alua o le Samoa ma ia faatalofa ai i le aofia.
E to’atele ua faaoo ane a latou faamalo ma faamanuia mo le tama’ita’i minisita i le isi vaega o le soifua o le a faataunuuina i le mae’a o lona taimi umi i upufai o le malo o Niu Sila.
Puna o Faamatalaga: https://www.rnz.co.nz/news/political/585206/national-s-judith-collins-retires-from-politics-appointed-law-commission-president
