Ua mae’a le fonotaga a le afioga i le Minisita o Galuega Tetele a le malo o Samoa le afioga ia Olo Afoa Fiti Vaai ma le Minisita na fai ma sui o le atunuu o Nauru i Brisbane i Ausetalia.
O le iuga o lea fonotaga o le talosaga mai lea a le atunuu o Nauru e iai le latou vaalele o lea ua fia lele atu i Samoa.
Ua tali manino iai le afioga i le Minisita ia Olo Afoa Fiti Vaai i lea talosaga, e ao lava ona fai lelei se latou tusi talosaga aloaia ona tuuina atu lea i le tamaitai Palemia o Samoa ma le Kapeneta e iloilo ai le latou mataupu pe talafeagai ma talia e le malo.
Auā o mataupu faapenei e lē mafai ona soona tuu faalauteleina ona o tulaga tau i pisinisi.
Ae o le silasila a le afioga i le Minisita ia Olo Fiti Vaai i le feiloaiga ma sui o lea atunuu, na maitauina ai le naunau mai o le atunuu o Nauru e fia maua le avanoa o le latou vaalele e lele ai i Samoa.
O Nauru o loo latou tilotilo i le lelei o turisi poo tagata tafafao ua agai i Samoa, faatasi ai ma se vaalele e lele mo le fela’ua’ina o uta ma faamomoli i Samoa.
O le ala lea o le naunau o lea atunuu i se vaalele mai Nauru e fealua’i i le va o atunuu e lua.
Saunoa le afioga i le Minisita o galuega tetele a le malo, e tele vaega e tatau ona tilotilo iai le malo i nei talosaga ina ia faamalieina uma vaega ma feutaga’ina o mea tau pisinisi.
O le taimi nei e na o le Air New Zealand ma le Fiji Airways o loo mafai ona feoai i le fela’ua’ina o uta ma faamomoli i va o atunuu.
Ae o le a talia le talosaga a le atunuu o Nauru i Samoa e ala lea i se latou vaalele e mafai ona lele atu i Samoa.
O Nauru e lua vaega o le latou talosaga e pei ona tuuina mai mo Samoa, o se vaalele e lele fela’ua’i ai tagata, ma se vaalele e lele e momoli ai uta ma faamomoli.
Afai ae talia lenei talosaga o lona uiga o le a mafai ona maua se faamāmā avega i feoaiga a tagata ma le au faipisinisi auā o lea ua iai isi vaalele e fai ai tauvaga mo vaalele e feoai ai tagata.
